நோய் எதிர்ப்பு மண்டலம் சீராக செயல்பட உதவும் உணவுகள்

நமது உடல் ஆரோக்கியத்துக்கு முக்கியபங்கு வகிக்கும் வைட்டமின் இ உடன் இணைந்து நோய் எதிர்ப்பு மண்டலத்தை வலுவாக்க செலினியம் சத்து உதவுகிறது. செலினியம் என்பது ஒரு கனிமம் ஆகும். உடலுக்கு தேவையான அயோடின் சத்துக்கும், உடல் மெட்டபாலிசத்தை சீராக வைக்கவும். கூட செலினியத்தின் பங்கு தேவை. மொத்தத்தில் செலினியல் உடலுக்கு ஆன் டி ஆக்ஸிடண்ட் போன்று செயல்படுகிறது.

உடலில் செல்கள் சேதமடையாமல் இருக்கவும், தைராய்டு சுரப்பிகள் சீராக இயங்கவும், ஆண் இனப்பெருக்கத்தில் விந்தணுக்கள் உற்பத்திக்கும் இவை மிக தேவையாகிறது. கூடுதலாக ப்ராஸ்டேட், நுரையீரல், குடல் புற்றுநோய் வரும் வாய்ப்பையும் தடுக்க செலினீயம் சத்து உடலுக்கு தேவையாக இருக்கிறது. இந்த செலினியம் நிறைந்த உணவுகள் எதில் எல்லாம் இருக்கிறது என்று பார்க்கலாம்.

காளான்

காளான் செலினியம் நிறைவாக கொண்டிருக்கும் பொருள்களில் முக்கியமானது. பாசி வகையை சார்ந்த தாவரம் இது. காளான்களில் பலவிதங்கள் இருந்தாலும் மொக்கு காளான், சிப்பி காளான், வைக்கொல் காளான் மூன்றும் உணவாக எடுத்துகொள்ளப்படுகிறது.

மூன்றுமே மருத்துவகுணங்களை கொண்டிருக்ககூடியவை. ஆய்வு ஒன்றில் காளான் தொடர்ந்து எடுத்துகொண்டவர்களின் உடலை பரிசோதனை செய்ததில் உடலில் நோய் எதிர்ப்புத்திறனை உருவாக்கும் டி செல் உற்பத்தி அதிகரித்துள்ளதாக கண்டறியப்பட்டுள்ளது.

காளானில் செலினியம் அதிகமாக இருப்பதால் இவை புற்றுநோய் எதிர்க்கும் பண்புகளை கொண்டிருக்கிறது. பெண்களுக்கு உண்டாகும் மார்பக புற்றுநோயையும் இவை தடுப்பதாக ஆராய்ச்சியில் கண்டறியப்பட்டுள்ளது.

குறிப்பு

பாலூட்டும் தாய்மார்கள், கீல்வாதம் இருப்பவர்கள், சரும அலர்ஜி கொண்டிருப்பவர்கள் தவிர்க்க வேண்டும் அல்லது மருத்துவரின் அறிவுரையோடு எடுத்துகொள்ள வேண்டும்.

சூரிய காந்தி விதை

செலினியம் நிறைந்த விதைகளில் இவை முதன்மையானது. பாதாம், முந்திரி போன்ற பருப்புகள் போன்று விதைகளில் மிக முக்கியமானது சூரியகாந்தி விதை. சூரியகாந்தி விதைகளில் மெக்னீஷியம் சத்துகள் இருப்பதால் இவை இதய ஆரோக்கியத்தை பலப்படுத்துகிறது.

சூரிய காந்தி விதைகளில் இருக்கும் வைட்டமின் இ, செலினியம் மற்றும் தாமிரம் போன்ற ஆக்ஸினேற்றிகள் புற்றுநோய் எதிர்த்து போராட உதவுகிறது. இதிலிருக்கும் செலினியம் புற்றுநோய் செல்களின் வீரியத்தை குறைக்கிறது.

கூடுதலாக இதிலிருக்கும் வைட்டமின் பி 6 புரதம் மற்றும் வளர்சிதை மாற்றத்தை ஒருங்கிணைக்கவும், உடலில் ஹார்மோன் சமநிலையை கட்டுப்படுத்தும் என்சைம்களும் நிறைந்திருக்கிறது. இதையும் நட்ஸ் போன்று சாதாரணமாக எடுத்துகொள்ளலாம்.

கேழ்வரகு

ஊட்டச்சத்து குறைபாடு நேராமல் இருக்க வேண்டுமெனில் எடுத்துகொள்ள வேண்டிய உணவில் கேழ்வரகு அவசியம். உடலுக்கு வலு கொடுக்கவும் ரத்தத்தி ஹீமோகுளோபின் அளவு அதிகரிக்கவும் இவை அற்புதமான மருந்து.

கேழ்வரகில் இருக்கும் பொட்டாசியம், மெக்னீசியம் மற்றும் செலினியம் சத்து இருப்பதால் இவை இதய நரம்புகளின் செயல்பாடுகளை பராமரித்து சீராக வைத்திருக்க உதவுகிறது. இதனால் இதயத்துக்கு கோளாறு நேராமல் பார்த்துகொள்ள முடிகிறது.

செலினியம் குறைபாடு இதய ஆரோக்கியத்தை பாதிக்க அதிக வாய்ப்புண்டு என்பது குறிப்பிடத்தக்கது. மேலும் புற்றுநோய்க்கிருமிகளின் பண்புகளை எதிர்க்கும் செலினியம் சத்து உடலில் செல்களை தாக்க கூடிய கிருமிகளை கட்டுப்படுத்தி, செல்களை உயிர்ப்போடு வைக்க உதவுகிறது.

ஈரல்

அசைவ உணவு சாப்பிடுபவர்கள் ஈரல் உணவை அதிகம் எடுத்துகொள்ள விரும்பு வார்கள். மென்மையான உணவாக இருக்கும். ஈரலில் முக்கியமான ஊட்டச்சத்துகள் அடங்கியிருக்கிறது. ஏனெனில் ஈரலில் இரும்பு, செலினியம், துத்தநாகம் போன்ற பயனுள்ள சத்துகள் அதிகளவில் நிறைந்திருக்கிறது.

ரத்த சோகையால் பாதிக்கப்பட்டவர்கள் அசைவ உணவு எடுத்துகொள்வதாக இருந்தால் ஈரலில் நிறைவாகவே சத்து இருக்கும். வைட்டமின் ஏ குறைபாடு இருப்பவர்கள் மாத்திரைக்கு மாற்றாக ஈரல் எடுத்துகொள்ளலாம்.

ஈரல் கொழுப்புச்சத்து நிறைந்தது என்பதால் அதிக அளவு எடுத்துகொள்வதும் ஆபத்து என்பதையும் புரிந்துகொள்ள வேண்டும். கோழி ஈரலை காட்டிலும் ஆட்டு ஈரல் நன்மை பயக்ககூடியது. அதே போன்று நாட்டு கோழி முட்டைகளை தினம் ஒன்றாக சேர்க்கலாம்.

நண்டு

கடல் வாழ் உணவுகளில் நண்டு செலினியம் நிறைந்த உணவாக சொல்லலாம். கால்சியம், புரதம் வைட்டமின் சத்துகள், தாமிரம், ஒமேகா 3, பாஸ்பரஸ், செலினியம், வைட்டமின் பி 12, துத்தநாக சத்துகள் உண்டு.

நண்டு இறைச்சியில் செலினியம் அதிக அளவில் உள்ளது. உடலில் கெடுதல் விளைவிக்கும் ப்ரீ ரேடிக்கல் என்னும் தீங்கு விளைவிப்பவற்றிலிருந்து அணுக்களையும், திசுக்களையும் சேதமடையாமல் காக்கிறது. மேலும் செலினியமானது தைராய்டு சுரப்பிகளின் ஆக்ஸினேற்றிகளின் சேதங்களை தடுப்பதன் மூலம் ஹார்மோன் சுரப்பு சீராகிறது.

கடல் வாழ் உணவுகளில் மீனிலும் எண்ணற்ற ஊட்டச்சத்து அடங்கியிருக்கிறது. மீனை எடுத்துகொண்டால் இரத்த உறைவை குறைப்பதோடு இதய நோய், பக்கவாதம் பிரச்சனைகளையும் வராமல் தடுக்க உதவுகிறது.

உடலில் செலினியம் அளவு குறைந்தால் தசைகள்வலி, தளர்வு உண்டாகும். இதயம் பெரிதாகும். ஆண்களுக்கு விந்தணுக்களின் எண்ணிக்கையில் குறைபாடு உண்டாகும். . உடலில் நோய் எதிர்ப்பு சக்தி குறையவும் காரணமாகும். உடலில் நோய் எதிர்ப்பு மண்டலத்தில் செலினியம் மிகவும் அவசியம் என்பதால் குறையாமல் பார்த்து கொள்வதும் நல்லது

Google+ Linkedin Youtube